Books like dostojevski

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Fjodor Michajlovitsj Dostojevski (Rössisch: Фёдор Михайлович Достоевский, verlatiens nao Fëdor Mihajlovič Dostoevskij, spreek oet: Fjódar Michájlavietsj Dastajévskiej, -iej laank oettrèkke, R laote rólle) (Moskou, 11 november, Gregoriaanse kalender: 30 oktober 1821 - Sint-Petersbörg, 9 fibberwarie, G.K.: 28 jannewarie 1881) behuurt bis eine vaan de groetse sjrijvers dee Rösland en mesjiens zelfs Europa oets gekind heet. Heer had 'ne groeten invlood op väöl dinkers en sjrijvers vaan de Negentienden iew, wie Sigmund Freud, Franz Kafka en Albert Camus.

Dostojevski woort gebore in 1821, Moskou. Ziene vaajer behoort bis de adelstand en de femilie waor in gooj doen. Dostojevski had drei breurs en drei zösters, op negejaorege leeftied verloor heer evels zien moojer aon tuberculose. Ziene vaajer hiemelde door wat me 'nen hartaonval neumde, evels woort heer in werkelekheid umgebrach door ein van zijn eige liefeigene. Dostojevski woort nao privésjaole gesjik, verspreid euver gaans Rösland en studeerde vervolges in Sint-Petersbörg. Op dee leeftied waor heer al bezeg mèt literatuur. Heer waor korten tied werkzaam in 't leger es inzjenieur, meh nao e jaor heel heer 't veur gezeen en begós ziech touw te lègke op 't sjrieve. In 1845 kaom zien ierste book oet (Erm Vouk) dat oonmiddelek e groet succes had. Zien hei-opvolgende sjriefsels waore minder succesvol. Dostojevski leet ziech heidoor evels neet oontmoedege en góng wijer op zie zelfgekoze paad. Heer had 'n veurleefde voor 't fantastische en abnormale, en in Sint-Petersbörg voond heer voldoende materiaol.